മുകുന്ദപുരം താലൂക്കിൽ ഇരിങ്ങാലക്കുടയിൽ നിന്ന് 10 കീ.മീറ്റർ സഞ്ചരിച്ചാൽ ഒരു വലിയ കോൾ നിലത്തിന്റെ മദ്ധ്യത്തിൽ മാടായികോണം എന്ന സ്ഥലത്ത് എത്തിചേരാം. അവിടെ പയ്യപ്പിള്ളി കാവലന്റെയും ചക്കിയുടേയും മകനായി 1923 ആഗസ്റ്റ് 10 ന് ജനിച്ചു. പച്ചപ്പിള്ളി മനയിലെ തലപ്പുലയനായിരുന്നു പിതാവ്. കോളേജ് വിദ്യാഭ്യാസത്തോടൊപ്പം പൊതുപ്രവർത്തനവും. അതുകൊണ്ട് വിദ്യാഭ്യാസം പൂര്ത്തീകരിക്കാൻ കഴിഞ്ഞില്ല. കൂടൽ മാണിക്യം ക്ഷേത്രം ഹരിജനങ്ങൾക്ക് തുറന്ന് കിട്ടുന്നതിനുള്ള സമരം, പാലിയം സമരം, കൂടംകുളം സഞ്ചാര സ്വാതന്ത്രസമരം എന്നിവയിൽ പങ്കെടുത്ത് അറസ്റ്റ് വരിച്ചു. 1948 ൽ അവിഭക്ത കമ്മ്യൂണിസ്റ്റ് പാർട്ടിയിൽ ചേർന്ന മാസ്റ്റർ തിരുകൊച്ചി പുലയർ മഹാസഭയോടൊപ്പം പാർട്ടി പ്രവർത്തനത്തിലും സജീവമായി. 1954ൽ തിരുകൊച്ചി നിയമസഭയിൽ അംഗമായി. 1957 ലെ ഇ.എം.എസ്. മന്ത്രിസഭയിൽ തദ്ദേശസ്വയം ഭരണം പട്ടികജാതി ക്ഷേമവകുപ്പുകളുടെ ചുമതല വഹിച്ചു. 1948 ജൂണിൽ സമസ്തകൊച്ചി പുലയർ മഹാസഭയുടെ വാർഷിക സമ്മേളനത്തിന് സംഭാവന പിരിക്കാൻ ഇരിങ്ങാലക്കുട കൂടൽമാണിക്യം ക്ഷേത്രത്തിന് സമീപത്തുള്ള കുട്ടൻകുളം റോഡിലിറങ്ങി പിരിവ് നടത്തിയ പുലയസ്ത്രീകളെ സവർണ്ണ ഗുണ്ടകൾ മർദ്ദിച്ചതിൽ പ്രതിഷേധിച്ച് ഇരിങ്ങാലക്കുട അയ്യങ്കാവ് മൈതാനത്ത് ജൂൺ 24ന് സർക്കാരിന്റെ നിരോധാജ്ഞ ഉത്തരവ് ലംഘിച്ച് പ്രതിഷേധയോഗം നടത്തിയതിനെതിരെ ചാത്തൻ മാസ്റ്ററെ പോലീസ് ക്രൂരമായി മർദ്ദിച്ച് ജയിലിലടച്ചു. കേരളത്തിലെ ആദിമ ജനതയായ പുലയർ വിവിധ പേരുകളിൽ സംഘടിച്ച് തമ്മിൽതല്ലി തലകീറി കൊണ്ടിരുന്നതിന് ഒരു പരിഹാരമായി ചാത്തന് മാസ്റ്ററുടെ നേതൃത്വത്തിൽ 1968 ൽ ഇന്നു കാണുന്ന പുലയർ മഹാസഭയ്ക്ക് തിരുവനന്തപുരം വൃന്ദാവനം സ്കൂളിൽ ചേർന്ന സമുദായ നേതാക്കളുടെ നേതൃത്വത്തിൽ രൂപം നൽകി. ചാത്തൻ മാസ്റ്റർക്ക് 4 മക്കളാണുള്ളത്. മോഹനൻ, രവീന്ദ്രനാഥൻ, സുമംഗലി, മുരളീധരൻ.ചരിത്രം രേഖപ്പെടുത്താൻ ആഗ്രഹിക്കാത്ത നേതാവായിരുന്നു ചാത്തൻ മാസ്റ്റർ. അതുകൊണ്ട് മാസ്റ്റർ നടത്തിയ വിമോചന സമരങ്ങളും തന്റെ വര്ഗ്ഗത്തിന് വേണ്ടി ചെയ്ത സേവനങ്ങളും പുതുതലമുറക്ക് ഇന്ന് അജ്ഞാതമായിരിക്കുന്നു. കല്ലറ സുകുമാരന്റെ ഭാഷയിൽ പറഞ്ഞാൽ കേരളത്തിൽ ചാത്തൻ മാസ്റ്ററുടെ സാമൂഹ്യപ്രവർത്തനത്തിന്റെ ഒരു രോമം ചായ്ക്കാന് പറ്റിയ നേതാക്കൾ കേരളത്തിൽ വേറെയില്ല എന്ന പച്ചപരമാർത്ഥം എത്ര ശരിയാണ്. അവസാന കാലങ്ങളിൽ മാസ്റ്ററുടെ മക്കൾ അച്ഛനെ കുറിച്ച് പലതും ചോദിച്ചറിയാൻ ശ്രമിച്ചെങ്കിലും ഒന്നിനും പിടികൊടുക്കാൻ തയ്യാറായിരുന്നില്ലെന്ന് മാസ്റ്ററുടെ ഇളയമകനും ഇപ്പോൾ ഇരിങ്ങാലക്കുട ബാറിന്റെ അഭിഭാഷകനുമായ മുരളീധരൻ ഗ്രന്ഥകർത്താവിനോട് പറയുകയുണ്ടായി. മാസ്റ്ററെ കുറിച്ച് എന്തെങ്കിലും അറിയണമെങ്കില് കെ.വി.കെ.വാര്യരുടെയും, സി.അച്യുതമേനോന്റെയും ചില കൃതികള് വായിക്കണം. സെയിൽസ് ടാക്സ് അസിസ്റ്റൻറ് കമ്മീഷണറായി സർവീസിൽ നിന്നും വിരമിച്ച മാസ്റ്ററുടെ ഭാര്യ കാളി 1912 ഡിസംബർ 12ന് അന്തരിച്ചു..
